კანის კიბო - მითები და რეალობა

კანის კიბო სიმსივნის ერთ-ერთი ყველაზე გავრცელებული ფორმაა. მსოფლიოში ამ დაავადების სხვადასხვა სირთულით ყოველწლიურად მილიონობით ადამიანი ავადდება. მიუხედავად გავრცელების ასეთი ფართო მასშტაბისა, მის ირგვლივ ჯერ კიდევ არსებობს მრავალი მითი და მცდარი წარმოდგენა. 

ამ სტატიაში მოგიყვებით ყველაზე გავრცელებული მითების შესახებ და გაგაცნობთ რეალობას.

მითი 1: კანის კიბო მხოლოდ ღია ფერის კანის მქონე ადამიანებს ემართებათ.

რეალობა - მიუხედავად იმისა, რომ ღია ფერის კანის მქონე ადამიანები მეტად მგრძნობიარეები არიან, კანის კიბო ნებისმიერს შეიძლება განუვითარდეს. დიდ გავლენას ახდენს გამაღიზიანებელი ფაქტორები და გენეტიკური წინასწარგანწყობა.

მითი 2: კანის კიბო ვითარდება მხოლოდ იმ უბნებზე, რომლებიც ხშირად ხვდება მზეზე.

რეალობა - კანის კიბო შეიძლება განვითარდეს სხეულის ნებისმიერ ნაწილზე, იმ ადგილებშიც კი, რომლებიც მზეზე საერთოდ არ ხვდება, მაგალითად, კეფა, ტერფის ქვედა საფარველი და პირის ღრუც კი. ამიტომ მნიშვნელოვანია სპეციალისტთან კონსულტაციისას შეიმოწმოთ ყველა საეჭვო ხალი ან ლაქა და არა მხოლოდ მზისგან დაუცველი უბნები.

მითი 3. რუჯი კარგი ჯანმრთელობის ნიშანია.

რეალობა - სინამდვილეში რუჯი კანის დაზიანების ნიშანია. როდესაც კანი ულტრაიისფერი გამოსხივების ქვეშ არის, ის გამოიმუშავებს მეტ მელანინს, რათა დაიცვას თავი. ეს იწვევს კანის გამუქებას და თავისთავად წარმოიქმნება რუჯი. უკვე არსებული რუჯი არ უზრუნველყოფს კანის დაცვას. ამიტომ მზის ქვეშ ყოფნისას აუცილებელია კანი დაიცვათ ძლიერი, SPF-ის შემცველი საცხებით და რაც მთავარია, მოერიდოთ სოლარიუმებს.

მითი 4 - მზისგან დამცავი საცხების გამოყენება მხოლოდ მზიან დღეებში გვჭირდება.

რეალობა - ულტრაიისფერი გამოსხივება მოღრუბლულ დღეებშიც დამაზიანებელია, რადგან თავისუფლად აღწევს ღრუბლებში. ამიტომ დამცავი კრემების გამოყენება აუცილებელია. ასევე მნიშვნელოვანია, ვატაროთ სპეციალური ტანსაცმელი და აქსესუარები, როგორებიცაა: ქუდები, გრძელმკლავიანი მაისურები, ქოლგა და მზის პიკის საათებში შევეფაროთ ჩრდილს.  

მითი 5. კანის კიბო ჯანმრთელობას სერიოზულ საფრთხეს არ უქმნის. 

რეალობა - კანის კიბოს შეუძლია სერიოზულ მდგომარეობას მიაღწიოს, გავრცელდეს სხეულის სხვა ნაწილებზე, გადავიდეს ორგანოებზე და გახდეს სიცოცხლისთვის საშიში. ამიტომ მნიშვნელოვანია ყველა საეჭვო ხალი ან ლაქა შემოწმდეს დერმატოლოგის მიერ.

იზრუნეთ ახლობელ ადამიანებზე, გაუზიარეთ ეს ინფორმაცია და დაიცავით თავი რისკებისგან. გახსოვდეთ კანის კიბოს ადრეული გამოვლენა და მკურნალობის დაწყება მნიშვნელოვნად ამცირებს არასასურველი შედეგების დადგომას. პრევენცია შესაძლებელია.

საფრთხეს ნუ შეუქმნით საკუთარ ჯანმრთელობას. გამოიყენეთ მზისგან დამცავი საშუალებები და პერიოდულად ჩაიტარეთ დიაგნოსტიკა. პროფილაქტიკისთვის მიმართეთ სპეციალიზებულ კლინიკებს.

უახლესი მიღწევების მქონე, ხელოვნური ინტელექტით აღჭურვილი ტექნოლოგიები და მაღალკვალიფიციური თანამშრომლებით დაკომპლექტებული გუნდი კლინიკა „კანის“ უპირატესობებს წარმოადგენს.

კანზე ზრუნვის დროა!